يوميـات فــؤاد

السلام عليكم ورحوة الله تعالى وبركاته

احبتي اعضاء المنتدى الاعزاء

أردت ان ابدع وان أخلق موضوعا ذات طابع يومي، (عبارة عن مسلسل مكون من حلقات) ادون

فيه كل ما يحدث لي يوميا وكل ما قد يحصل لي لا قدر الله خيرا او شرا. وهدفي هو ان يناقشني

الاعضاء فيما افعله وفيما يجب ان افعله يوميا وطبعا مرفوقا بالردود التي أرجو ان تكون مملوءة

بالنصائح .

و كبداية أقدم لكم:

الحلقة الاولى:

اه نبدها من الصباح عندما نهضت من الفراش على الساعة 7:20h دخلت للدوش حبيت نغسل

وجهي سبت lavabo مبوشي ، معنتها نهاري باين من الصباح وعلى بالكم علاه صبتو مبوش

لاخاطرش عندي ختي لازم لازم لازم تصفي شعرها فيه ،عندها الزهر ما سبتهاش.... المهم

صنعتو و غسلت وصليت وتقهويت ورحت للجامعة درست 03 ساعات و خرجت تلاقيت مع

صحابي راكم عارفين كيفاش القهاوي و الجمايع..من بعد رجعت للجامعة قريت 1 ساعة

وخرجت..وأنا جاي للدار قارعت قريب 15 دقيقة باش ركبت في الطاكسي. ومن بعد دهمت البنك

الي راني داير فيه الستاج انتاعي قعدت تقريبا ساعتين..ومن ثم رجعت للدار. دوشت وصليت

وتقهويت .ثم جاو عندي صحابي راكم عارفين لازم نخرج... ومن ثم رجعت للدار ودروك راني

مع المواضيع والردود في منتدانا الغالي.

المهم ياجماعة اذا قصرت في حاجة قولولي

ايا للحلقة الجاية نقولك حاجة مليحة و يا ريت تفصل بزاف باه نعرفوك مليح

شكرا مروة

اوكي راح نقدمها بالتفصيل

فؤاد نهارك شباب
بصح متقولش لاختك الله يحفظك اوكي
ونتمنى ديرها خاطر هدي هي نصيحتي نتمنى ماقلتلها والو

السلام عليكم ..شكرا سليمة لا لا ماقلتلها والو لاخاطرش راهي تفوت فالباك بلن.

المهم

الحلقة الثانية:

ياجماعة اليوم مانضتش بكري حتى 09 باش نضت. صليت ولبست حوايجي وتقهويت ورحت

للجاميعة.قريت ساعة وكي خرجت تلاقيت بوحد الصامطة ،هي فالحق ماننجمش نقول عليها

سامطة. يسموها فطيمة شابة ماعندي مانقول عليها .هي مسكينة طامعة وانا لاعلاقة ...المهم

جابت عليا الوقت حتى 12:30 ومزية عندي قراية على 12:30 ..قريت وخرجت.

رحت عند خالتي زيدت طفلة سماتها أية عينيها زرقين كيما نتاع يماها راكم عارفين لازم تشريلها

كادو .على هذا قبل ماندخل عندها رحت عند البيجوتري شريتلها كادو صغير. ورحت عندهم

وشبعتها بوووس. ومن بعد رجعت للدار دوشت وصليت وتقهويت ودروك راني في المنتدى.



هذا هو

اتمنى ان لا اكون قد اطلت عليكم

و ترقبوا الحلقة المقبلة

فؤاد اليوم نهار شباب بزاف بزاف
ومبروك المولود جديد
ونقول لاختك الله يوفقها فالباك ان شاء الله

امين ان شاء الله والله يبارك فيك اختي سليمة

ترقبو الحلقات المقبلة

هدي حلقة مليحة......... مبروك عليكم زرقة العيون ربي يخليهالكم هادا كادو من عندي

يوميات رائعة ربي يجعل كل أيامك سعادة

ومبروك ال bébé

السلام عليكم جماعة كي راكم دايرين

نتمنا ان شاء الله تكونوا بخير عليكم

اسمحولي بزاف بزاف على الغياب الي حدث لي المرة الاخيرة ونتمنى ان شاء الله

مايزيدش يتكرر.

المهم جبت الكم اليوم الحلقة الثالثة من يومياتي اسف أسف اسف على التأخير

الحلقة الثالثة:

نبداها بنهار لخميس كيما العادة والعوايد المنواض الصباح على 09 صليت

ولبست حوايجي وتقهويث ، قريت الجرنان في pc وخرجت .

جماعة مايخفاش عليكم راني نحضر في مذكرة التخرج الجامعي.

ايا في نص النهار عيطلي واحد فاميلتي في الهاتف من العاصمة كنت موصيه على مجموعة

من العناوين كان خرجهم لي واحتافظلي بيهم عندو، ايا ركبت طاكسي ديراكت العاصيمة

ايا لحقت فما دوشت وتقهويت خرجنا برا نحوسوا ما خلينا حتى بلاصة

(جماعة العاصمة بلعشية روعة) .من بعد عيطت في الهاتف لزملائي كانوا يدرسوا معايا

قصرنا وجمعنا حتى 11 وحنا برا ما خلاونيش ندخل للدار. ايا دخلنا للدار دوشت

(سمحولي نموت على الدوش)، وصليت وتعشيت ورقدنا .

مع الصباح بالجمعة حاجة وحدخراة في العاصيمة راكم عارفين la suite

رجعت للدار وانا عيان حتى رقدت فالطاكسي المهم لحقت للدار دوشت وريحت.

شعلت pc نتاعي تلاقيت مع أمينة التي كان لها دور كبيرفي عودتي هدرنا وهدرنا وهدرنا

علمتني وحد الطريقة باش تعرف الشخصية نتاعك ..(قولولها تعلمكم، هايللللللة)

ونهار السبت يعني اليوم : مانقراش وانا كي يكون عندي فيد بالسبت والثلاثة ولخميس نخدم

راكم عارفين تجي لعشيا لازم تدوش وتريح وتشعل pc وتجاوب على ردود الاحباب

والاعزاء في المنتدى.

هذا هو بالنسبة لايامي الاخيرة .المهم اتمنى اني لم ارتكب غلطات أو تقصير واذا كاش

ما لا حظتوا قولولي باش نحسن من التصرفات نتاوعي ...هذا ماكان

الـــــى اللقـــــاء فـــي الحلقــــة القـــــــادمة

فؤاد

حلقة مليئة بالاحداث... مليحة
ربي يكملك و يوصلك لاعلى الدرجات في الدنيا و الاخرة امييييييييييييين
و متزيدش تروح

ان شاء الله ليك انتي مروة ولكل عضو معنا ولكل مؤمن

وشكرا جزيلا كثيرا مروة

السلام عليكم كي راكم دايرين ان شاء الله تكونوا بخير وعلى الف خير

اليوم جيت ليكم مع حلقة من حلقاتي التي اتمنى

ان تستفيدوا منها ولو باخطائي.

الحلقة الرابعة:

يوم الاربعاء كيما العادة النهوض على 09 نتاع الصباح

صليت ولبست حوايجي وتقهويت ومن البعد الذهاب الى الجامعة

مباشرة. تلاقيت بجماعة صابي يقراو معايا في الكلاسة .وبالمنسبة

حبيت نقدم الكم صحابي هادو لمهابل رهم مسلمين عليكم:


[img][/img]

المهم قرينا وخرجنا ومن بعد رحت للمكتبة كانوا خاصيني

كتب ومذكرات ،و كي جيت جاي للدار ماسبتش طاكسيات ركبت

في البيس. راكم عارفين كيفاش دايرين les bus نتاع البلاد هوما يمشوا

والناس طالعين هابطين.ايا ركبت بصح قعدت واقف عند الباب لاخاطرش

معمر بالركاب. من بعد انا سهييت حتى تبلع الباب على يدي واش نقولكم

مازال لدروك دارني .المهم سالامات ورجعت للدار لعشيا ريحت وخرجت

وعاودت دخلت للدار تلاقيت مع سليمة قاتلي بلي راهم حابين ينتاقلوا ويبدلوا

مكان الاقامة. راحي حابة تبقى فالمنتدى بصح ماشي غرضها الله غالب.

قاتلكم نحبكم بزاف ورايحة تتوحشكم بزاف بزاف...المهم انا ماقعدش معا

بزاف رحت نعمر الماء في الشاتو. ومن بعد عيتولي صحابي رحنا تفرجنا

الماتش نتاع البارصا مع المانشستر حتى 10 نتاع الليل.

واليوم الخميس نورمالمون نروح نخدم بصح مانضتش بكري حتى 09

كي نضت صرا وحد الحادت في الطريق عند الدار انا في الدار سمعت

زقا نتاع المرة الي كانت راكبة ...المهم سالامات ..

ودروك راني في المنتدى

هذا هو اتمنى ان تستفيدو من حلقاتي

والى اللقاء في الحلقة المقبلة

شكرا جزيلا فؤاد كي شاركتنا يومياتك

وربي يجيب الشفاء ليدك هههههه

شكرا فؤاد

بالشفة على يدك ان شاء الله

مارسي

حلقةربي يجعلك الشفا و لو انها ضربة صغيرة
المهم الى اللقاء في الحلقة القادمة

بصراحة انا اليوم اول مرة نطلع على هاد الموضوع نتاع اليوميات..و ندمت اللي ما شفتهش من قبل..وين كان مخبي؟؟؟

و الله غير فكرة شابة فؤاد و يومياتك ممتعة..اه و سلامت يدك..و ننتظر في البقية نتاع اليوميات

مشكوووووووور

رانا نستنى الحلقة الجاية

شكرااااااااااا خويا فؤاااااااااااد

راني نستنى في الحلقة الجاية

فؤلد والله غير حلقات شابين
ربي يساهلك فالميموار ونتمنى لك الشفاء العاجل وراني جيت

السلام عليكم ياولاد المنتدى ...كي دايرة لاباس ؟؟ الحمد لله.

اسمحولي بزاف بززاف على الغياب . وشكرا لكم جميعا ولكل متتبعي

يومياتي البسيطة والمتواضعة. اليوم جبت الكم الحلقة الخامسة:

ما نقدرش نحكي واش صرالي في قاع ليمات علاهاذا كل خطرة نحكي واش

صرى في اليومين الاخيرين..

بـــون. نبداها بيوم الاربعاء كان عندنا امتحان على الساعة 8:30 ايا نضت

على 6:30 توضيت صليت ريقلت روحي ولبست حوايجي ، تقهويت ورحت

للجاميعة، ايا جوزت الامتحان كيما كان الحال فاتوا غايا حتى 10:00.

ومن بعد خرجت انا وصحابي للقهوة غي تماك عنك الجامعة شربنا حوايج باردين

ومن بعد كل واحد ماراح في حالو...انا رجعت للدار كي كنت راكب فالطاكسي

عيطتلي طفلة برقم مجهول قالتلي فؤاد، قلتلها واه ، ماحبتش تقولي هي شكون

ومن بعد قاتلي حرام عليك وغلقت في وجهي ...وانا راني متأكد بلي مازال في

حياتي ما أسأتش ولا خصرت مع وحدة..انا راني شاك في وحدة ،،،،هاديك الي

حكيتلكم عليها في الحلقات الاولى ...المهم الله يهديها.

كي لحقت للدار نفس الروتين : دوشت وفطرت صليت خرجت ما دخلتش بكري

حتى لنص الليل ..دخلت للمنتدى ماصبت حتى حد ...ونهار لخميس نضت شويا

بكري لاخاطرش كانت عندي خدمة ..والخدمة الي راني فيها المعلم انتاعي عندو

أورديناتور بالانترنت كنت ندخل مرة على مرة حتى لقيت نهاد

قاتلي بلي كملت امتحانات الباكالوريا وجوزتهم غايا ..خليتها تحكي مع امينة

وخرجت لاخاطرش نحشم من المعلم مانبغيش نكونيكتي قدامو..المهم فات

النهار.و لعشيا على 15:00روحنا لمطار هواري بومدين بالعاصمة باش

نلاقيو للاب نتاعي كان عندو اسبوع كي راح لباريس ..

ومن بعد رجعنا للدار .. بصح ياجماعة الطريق شرق غرب مابين الشلف والجزائر

العاصمة روعة روعة روعة . المهم حبست في نص التريق باش نشري حوايج

وهما كملو التريق للدار..شريت ودخلت للسيبار انترنت لقيت غير نهاد قعدت شويا

وخرجت ورجعت للدار..كي لحقت قالتلي الأم نتاعي فالدار بلي وليد عمي راه

فالمستسفى دارولو عملية جراحية على الأنف نتاعو تكسر بسبب كرة القدم فى

الملعب...وكان لازم نروح عندو ...رحت عندو كي لحقت قالولي بلي وقت

الزيارات فات بسيف بسيف بسيف باش خلاوني نشوفو صبت الام نتاعو تماك

في حالة واش نقولكم الله يجعل من ربي يشافيه ويشافي جميع المرض الي في

المستشفى .... ياجماعة اذا راكم حابين تشوفو الدنيا أدخلو للمستفى

ودورو على المرضى وشوفوهم كي راهم دايري .........

ايا رجعت للدار وانا في حالة لا يحسد عليها ..واليوم الجمعة نضت على

09:30 صليت وتقهويت وراني معاكم دروك بصح على 11 لازم نروح

تاني للمستشفى نزورو لانو زيارة المريض حاجة كبيرة ..




المهم هاذي هي

شكرا لكم جميعا وان شاء الله ما نكونش طولت عليكم

بارك الله فيكم على تتبعكم للحلقات

واتمنى ان تكونوا قد استفدتم منها

كما اتمنى ان لا تنسونا بردودكم المكملة لهاته الحلقات

وشكرا

تقبلوا مني احلى التحيات والى اللقاء الى حلقة أخرى ان شاء الله.

فـــــؤاد

ترقبوا الحلقات القادمة ان شاء الله

ايام شابة فؤاد
نتمنى الشفاء لولد عمك ولجميع المرضى يا ربي
واله يصبر امو
ونقول لبابك عالسلامة لارض الوطن
تقبل مروري

السلام عليكم

امين اجمعين ان شاء الله يخرجوا كامل بالصحة والعافية

شكرا ليك سليمة على الردود التي لا طالما اجدها بعد كل

مشاركة من مشاركاتي...شكرا

يوميات رائعة فعلا

نتمنالك السعادة في حياتك

وربي يوفقك في الإمتحانات وان شاء الله تفوت للماستر وتكون من الأوائل

يومياتك مليحة ما فيهاش روتين ... المهم ربي يجعل الشفا لعمك و احكيلي لحكاية برك كيفاه

حتى تكسر الانف تاعو بليييييييييييييييز يا برنس

الى اللقاء في الحلقات القادمة